పలుకు

Author: The Editors Desk

  • కథాకదనం / Story Contest

    కథాకదనం / Story Contest


    #పలుకు.ఇన్ నిర్వాహక బృందం నుండి మిత్రులందరికీ శుభాకాంక్షలు.

    ప్రముఖంగా తెలుగు ఔత్సాహిక రచయితలను ప్రోత్సహించి, తెలుగు పాఠకులకు ఆసక్తికరమైన రచనలను అందించాలన్న ఆలోచనే, పలుకు.ఇన్.
    ఆగస్టు 9న మీ ముందు ముస్తాబై నిలచిన ఈ వేదిక, మీ అందరి ఆదరణతో వినాయక చవితి పండగ చేసుకుంది. నేటికి 40మందికి పైగా సభ్యులను చేర్చుకుంది. తోటి తెలుగు భాషా ప్రేమికులుగా మీ అందరినీ, మీలోని రచయితని మన తెలుగు ప్రపంచానికి పరిచయం చేయమని ఆహ్వానిస్తోంది.

    ఈ సందర్భంగా, ఈ దసరా పండగ వేడుకగా ఒక కథల పోటీ నిర్వహించబోతున్నాం. సెప్టంబర్ 19 మొదలు, అక్టోబరు 7 వరకు మీరు మీ కథలను మాకు పంపవచ్చు.
    ఈ పోటీలో 16సం.లోపు వారు ఒక వర్గంగాను, 16సం. – అంతకు పైబడిన వారు మరొక వర్గంగాను విభజింపబడతారు.
    ప్రతి వర్గం నుండి, ఎంపిక చేయబడిన మూడు కథలకు దీపావళి అనంతరం మా తరఫున బహుమానం అందచేయబడుతుంది.

    పోటీ తాలూకు పూర్తి వివరాలు, మీ కోసం:

    1. సెప్టంబర్ 19 నుండి అక్టోబరు 7 వరకు, మీరు రాసిన ఒక కథ, పోటీ కోసం మాతో పంచుకోవచ్చు.
    2. పాల్గొనదలచిన వారు, పలుకు.ఇన్‌ లో సభ్యులై ఉండాలి. సభ్యత్వం ఈ లింక్ ద్వారా నమోదు చేసుకోవచ్చు – https://restore.paluku.in/register. సభ్యత్వం ఆమోదించిన అనంతరం పలుకు.ఇన్‌ లో మీ రచనను అప్‌లోడ్ చేయవచ్చు.
    3. పోటీకి పంపదలచిన కథను పోస్ట్ చేయటానికి తప్పనిసరిగా “#కథాకదనం” అనే హాష్‌టాగ్ కథాశీర్షిక / టైటిల్ లో వాడవలసి ఉంటుంది. అలాగే, కథాకదనం / Story Contest కాటగరీలోనే పోస్ట్ చేయవలసి ఉంటుంది.
    5. పోటీ రెండు వర్గాలుగా విభజింపబడుతుంది. 16సం. వయసు లోపు పిల్లల కోసం ఒక వర్గం. 16సం. నుండి వయో పరిమితి లేకుండా మరొక వర్గం.
    6. మీ 16 సం. లోపు పిల్లల కథలను మీ అకౌంటు ద్వార పంచుకోండి, పోస్టు క్రింద పిల్లల పేరు, చదువుతున్న క్లాసు పంచుకోండి.
    7. రచయితలు తమ స్వీయ రచన ఏదైనా (కథ) ఒక ఎంట్రీ మాత్రమే పంపగలరు. ఒకటికంటే ఎక్కువ రచనలు తిరస్కరించబడతాయి.
    8. మీరు రాసిన కథ నిడివి ప్రతి పేజీ/పుటకి 200-250 పదాలు చప్పున కనీసం 1000 పదాలు (4 pages) నుంచి మొత్తం మీద 2000 పదాలు  మించకుండా ఉండే విధంగా చూసుకోండి. 16 సం. లోపు పిల్లలకి కథ నడివి 500 పదాల నుంచి 1000-1200 పదాల వరకు ఉండేలా ప్రచురించండి.
    9. కథావస్తువు, కథనం పట్ల ఎంపిక మీదే. అయితే, అశ్లీలత, అభ్యంతరకరమైన భాష, రాజకీయ, సినీ మరే ఇతరుల గురించిన వ్యక్తిగత విమర్శలు, అసంగత ప్రస్తావనలు నిషేధం అని గమనించండి.
    10. పోటీకి పంపబడిన కథలలో, ప్రతి వర్గం నుండి, నిర్ణేతలు మెచ్చిన మూడు కథలకు బహుమతి అందచేస్తాము.
    11. ఈ పోటీకి సంబంధించినంత వరకూ, బహుమతికి అర్హతలున్న కథల ఎంపిక, బహుమతి వితరణాధికారం పూర్తిగా మా పలుకు.ఇన్ నిర్వాహకులది, నిర్ణేతలది మాత్రమే. ఈ విషయం పట్ల ఎటువంటి ప్రశ్నలు, విమర్శలు అంగీకరింపబడవు.
    12. రచయితలు పోటీతో సంబంధం లేని తమ ఇతర రచనలను కూడా ఎప్పటిలాగే పలుకు.ఇన్ బ్లాగ్ పేజి‌లో పంచుకోవచ్చు.

    ఈ పోటీ ప్రకటన మీ మీ సమూహాలతో కూడా పంచుకోగలరని మా విన్నపం.

    అభినందనలతో,
    సంపాదకులు
    పలుకు.ఇన్

    5
  • ఇన్‌సైడ్‌మల్లి

    ఇన్‌సైడ్‌మల్లి

    ఈ తరం రచయిత వి.మల్లికార్జున్‌తో కాసేపు…  

    ఊరు నల్లగొండ. పేరు మల్లికార్జున్. ట్విట్టర్ అవతారం (X account) @insidemalli.
    చదువు పూర్తయిందన్న నాటికి ఇంజినీరుగా డిగ్రీ చేతిలో. రాయాలని దాచుకున్న కథలెన్నో మనసులో. ఉద్యోగం కొంత కాలం “సాక్షి,” “వెలుగు”పత్రికలలో. ఎలాగూ కలం చేతిలో. ఇక చుట్టూ చూసిన, చూస్తున్న లోకం, రెక్కలు కట్టుకు ఎగిరే తన ఊహాలోకం… రచయితగా సాకారం! 

    ఇరానీ కేఫ్, కాగితం పడవలు, నల్లగొండ కథలు.. రచయిత మల్లికార్జున్ కథలు ఎంత పాప్యులర్ అయినాయంటే, ఎంతగా చదువరుల ఆదరణ పొందాయంటే, కాగితం పడవలు అచ్చై, అమెజాన్‌లో అందుబాటులో ఉందన్న రోజే, “అన్నా పీడీఎఫ్ ఉంటే పంపుతావా?” అని వాట్సాప్ సందేశాలు అందుకునేంత! 

    తన కథలు పుస్తకంగా ముద్రించుకోవటానికి, తనకు నచ్చిన విధంగా డిజైన్ చేసుకుని, తన పాఠకులను నేరుగా చేరాలనే ప్రయత్నంగా “అజు పబ్లికేషన్స్” ప్రచురణ సంస్ఠ స్థాపించి, తనతో పాటు మరెందరో కథకులను కూడా తెలుగు సాహితీ లోకానికి పరిచయం చేసాడు. ఈరోజు వారంతా మనకు సుపరిచితులవటానికి తను ఊతమయాడు.  

    ఇందులో మాకు తెలీని విషయాలేమున్నాయనీ… నీకెంత దగ్గరో, మాకూ అంత సన్నిహితుడేగా అని విసుగుపడేవు.. అందుకే, ‘నీకు నా ప్రేమ,’ అనే వాక్యంతో మనందరికీ దగ్గరై, అందరినుండీ అంతులేని అభిమానం అందుకున్న మన నేస్తంతో కాసేపు.

    ఐతే ఇందులో ఓ చిన్న తిరకాసుంది. వీడు చెప్పేవన్నీ ‘ఔను కథలే…’నో, ‘ఔను కదా!’లో, మనకెలా తెలుస్తుంది?! అందుకే మేం కూడా గెలివిగా పలుకు.ఇన్ టీమ్‌నుండి ఓ కథా రాకాషి.ని బర్లోకి దింపాం! గిచ్చు, గిల్లు, నడ్డిమీన్నాలుగు ఛంపెయ్యూ.. నీక్కొత్తగా నేరిపీక్ఖల్లా కదా. నాలుగు ప్రెశెన్లూ, వాటికి నాలుగింతలు జవాబులూనూ తే, ఫో…, గో గల్ల్ డూ యిట్టని తోలాం!

    పక్క పేజీలో మల్లితో ముచ్చట. 
    మనందరి తరఫున మాధురి. మన కోసం,  తనవైపునుండి మల్లి.
    చదవండి. ఈ ఇంటర్వ్యూ గురించి మీ స్పందన తెలియచేయండి. మీకూ ఏమైనా ప్రశ్నలున్నాయా? అడగండి.

    అభినందనలతో,

    సంపాదకులు
    పలుకు.ఇన్

    1
  • మల్లితో ముచ్చట

    మల్లితో ముచ్చట

    రచనా ప్రక్రియ అనేది ప్రయత్న పూర్వకంగా అలవడుతుందా? సహజసిద్ధమైన లక్షణమా? అది ఎవరికైనా సాధ్యమేనా? Can you consciously decide and become a story-teller?

    రచనను ఒక క్రాఫ్ట్‌గా చూసుకుంటే, ఆ క్రాఫ్ట్ నేర్చుకుంటే వస్తుందా అంటే కచ్చితంగా వస్తుంది. నిజానికి రచయితలనేవాళ్ళంతా ఈ క్రాఫ్ట్‌ని సాధన చెయ్యాల్సిందే. అలాగని క్రాఫ్ట్ నేర్చుకోవడం ద్వారానే కథలు రాయగలమా అంటే రాయలేమనే చెప్తాను. ‘ఇది సహజసిద్ధంగా వచ్చే లక్షణం, రక్తంలో ఉంటుంది.’ ఇలాంటి మాటలు నేను మాట్లాడను. స్వభావరీత్య మనలో సమాజాన్ని దగ్గరగా చూసి మనుషుల్ని, పరిస్థితుల్ని అర్థం చేసుకునే లక్షణం ఏదో ఉండాలని అనుకుంటాను. ఎంపతీ, హానెస్టీ కథలు చెప్పడానికి కచ్చితంగా ఉండాలి. ఇది నేర్చుకుంటే వచ్చేదా అనేకంటే ఇదే ఒక వే ఆఫ్ లైఫ్ కావాలి.  

    రచయిత తన చుట్టూ నిర్మించుకునే ప్రపంచంలో, పాఠకుడికి ముందునుండీ ఒక స్థానం ఉంటుందా? అంటే, చదువరుల స్థితి, స్థాయిలనుసరించి రచన సాగుతుందా? లేక, కథ తనను తాను మలచుకొని, తనదైన రూపంలో మాత్రమే పాఠకుడిని చేరుతుందా?

    రచయితలందరి తరపున చెప్పలేను గానీ, నాకైతే రాయడమనేది చాలా పర్సనల్. ఏదైనా రాసేటప్పుడు, ఇది చదివేవాళ్ళు ఎలా తీసుకుంటారని ఒక్కసారైనా ఆలోచించను. ఒక పాఠకుడ్ని ఊహించుకొనైతే నేను కథ రాయలేను. 

    రచయిత దృష్టి పెట్టాల్సింది తన మనసులో మెదిలే కథాంశం, తన భావోద్వేగాల పైననా? లేక ఆ రచనతో తను చేరదలచిన పాఠకుల ఒప్పుదల పైనా?  

    కచ్చితంగా కథాంశం, తన భావోద్వేగాలపైనే అనుకుంటాను. పాఠకులు ఏమనుకుంటారని ఏదైనా రాస్తే, మనకు మనమే ఆ రచనకు మెల్లమెల్లగా దూరమవుతామేమో. అయితే జాన్రా ఫిక్షన్‌లో రచయితకు పాఠకుడి ఒప్పుదలతో అవసరం ఉంటుందనుకుంటాను. 

    సమకాలీన కథావస్తువు అధికతమంగా ఏ విషయపరంగా ఉంటున్నది? కథావస్తువుల ఎంపికలో వైవిధ్యం ఏ మేరకు కనపడుతున్నది? ఏ విషయం పట్ల అలక్ష్యం చూపుతున్నారు?

    తెలుగు సాహిత్యమనే కాదు, ఎక్కడైనా కొన్నాళ్ళపాటు ఒక ట్రెండ్ ఉంటుందేమో. నేను చదవడం మొదలుపెట్టిన రోజుల్లో అస్తిత్వ ఉద్యమాల ప్రభావం వల్లనేమో ఆ రచనలు ఎక్కువగా కనిపించేవి. గత కొన్నాళ్ళుగా ప్రేమకథలు చాలా చెప్తున్నారు. నేటి తరం ఎదుర్కొంటున్న మానసిక సంఘర్షణలను కథల్లోకి తీసుకురావడం కూడా ఉంది. అలక్ష్యం చేస్తున్నారని చెప్పను గానీ, స్త్రీ పురుష సంబంధాల్లోని కాంప్లెక్సిటినీ చూపించడం తక్కువ ఉందనిపిస్తోంది. 

    ఈనాటికి కూడా వివిధ రచనా ప్రక్రియలకు పాఠకలోకంలో ఆదరణ వుందా? నవలలు, నాటికలు, గేయ రూపక కథా రచనలను చదువరులు స్వాగతిస్తారా?

    నవలలు, కథలు ఇప్పటికీ బాగా చదువుతున్నారు. కవిత్వానికి కూడా ఆదరణ ఉంది. నాటికలు, గేయ రచనలకు పాఠకుల ఆదరణ పక్కనబెడితే రచయితలే అటువైపు చూడటం తగ్గిపోయింది కదా! సినిమాలకు పాటలు రాయడాన్ని పూర్తిస్థాయి కెరీర్‌గా తీసుకున్న కవులు కూడా ఉన్నారుగా. 

    ఎందువలన ఇటువంటి రచనా ప్రక్రియలు మరుగున పడుతున్నాయి? వీటి పట్ల రచయితలు ఎందుకు ఉదాశీనంగా ఉంటున్నారు?

    పైన చెప్పినట్టు కథలు, నవలలు చదవడంలో ఉన్న సౌకర్యం ఇతర ప్రక్రియల్లో లేకపోవడం వల్ల అనుకుంటాను. అలాగే సినిమాలకు దగ్గరైన తర్వాత పాఠకులే తగ్గిపోయిన చోట రచయితలైనా ఈ ప్రక్రియల పట్ల ఆసక్తి చూపించి ఏం చేస్తామనుకొని ఉండొచ్చు!

    మన సినిమాలు, నవలలు ఇంకా కూడా బాహాటంగానో, అంతర్లీనంగానో, మనకున్న పురాణ ఇతిహాస కథలను, జానపద గ్రామీణ ప్రాంతాల గాథలనూ ఆధారంగా చేసుకుంటాయి. వీటికెందుకింత ఆదరణ? సమకాలీన రచయితగా, ఒక పాఠకుడిగా వీటిని మీరెలా చూస్తారు?

    బహుశా పురాణ ఇతిహాస గాధలు మన జీవితాల్లో భాగమైపోవడం వల్లనేమో, మనం కథలు చెప్పే క్రమంలో ఆ శిల్పం వచ్చి చేరుతుందేమో. ఇంకొకటి ఎంతటి క్లిష్టమైన విషయాన్నైనా సులువుగా చెప్పే నేర్పు మనకు అక్కడ్నించి వచ్చిందనుకుంటాను. నేను రచయితగానైనా పాఠకుడిగానైనా కథ చెప్పడానికి అవసరమైనప్పుడు వీటిని వాడితే తప్పేమీ లేదనుకుంటాను. పురాణాలను మెటఫర్‌గా వాడి చెప్పే ఆల్టర్నేట్ కథల్ని చదవడానికి నేనంత ఇష్టపడను. 

    కవి/రచయిత సమాజం తన ఎదుట ఉంచుకున్న నిలువుటద్దమంటారు. ప్రస్తుత పరిస్థితులలో, ఇది నిజమేనా? 

    సమాజం దీన్ని నమ్ముతోందా? సినిమాలను సినిమాలుగా చూడండి అనే రోజుల్లో ఉన్నాం కదా. సాహిత్యానికైనా అలాంటి పరిస్థితే ఉందేమో. నేనైతే సమాజాన్ని కొంచెం దగ్గరగా చూసి అర్థం చేసుకొని చెప్పేవాడు రచయిత అనుకుంటాను. 

    ద్రష్ట/స్రష్టగా నిలబడటానికి రచయితకుండాల్సిన లక్షణాలేంటి? అతడిలో మనం చూడవలసిన నిబద్ధత ఏంటి? 

    నిజాయితీ, సహానుభూతి ఇవి ఒక రచయితకు తప్పకుండా ఉండాలనుకుంటాను. ఒక్కసారి బయటికొచ్చి చుట్టూ ఉన్న ప్రపంచాన్ని ప్రేమించి చూడగలిగితే మనకెన్నో కథలూ ఎందరో మనుషులూ తారసపడుతుంటారు. అన్ని కథల్నీ రాయాల్సిన అవసరం కూడా లేదు. అలా బతికేస్తే ఎప్పుడో రాయాల్సిన కథలు రాయాల్సిన రోజు తప్పకుండా వస్తుంది.  

    రచయిత/కవి సమాజ స్థితిగతుల లోపాలను ప్రశ్నించి తీరాలా? ఆ విధమైన బాధ్యత వ్యక్తమైనదే ఉత్తమ రచన అనుకోవాలా?

    సమాజంలోని లోపాల్ని రచయిత కచ్చితంగా ఎత్తి చూపాలి. మనం ఏ వైపు నిలబడాలో తెలియకపోతే, అర్థం చేసుకోకపోతే మనం రాసే రచనలకు అర్థం ఏముంటుంది? అయితే అదే ఉత్తమ రచన అవుతుందని కూడా అనుకోవాల్సిన పని లేదు.  

    మీ ఆలోచనలో సామాజిక బాధ్యత అంటే ఏమిటి? మీ రచనలు ఆ బాధ్యతకు లోబడి, ఆ నిర్వచనానికి కట్టుబడి ఉంటాయా?

    పై సమాధానానికి కొనసాగింపుగానే చెప్తాను. సామాజిక బాధ్యత అందరు పౌరులకు ఎలా ఉండాలో, రచయితలకు ఇంకాస్త ఎక్కువే ఉండాలి. మన కథలు పనిగట్టుకొని ఒక సామాజిక సమస్యను చెప్పకున్నా, మనం కథ చెప్పే తీరులో పాత్రల్ని మలిచే తీరులో మనిషిగా ఈ రచయిత ఎక్కడున్నాడన్నది తెలిసిపోతుంది. అంటే నేనొక స్త్రీవాద కథ చెప్పాలని ఒక కథ రాయాల్సిన పనిలేదు. నేను స్వతహాగా స్త్రీవాదిని అవ్వడం వల్ల ఆ కథ చెప్పేటప్పుడు నేనెంత కట్టుబటి ఉంటానో అర్థమైపోతుంది. అలా చూసినప్పుడు ఈ బాధ్యత ఇన్నేట్‌గా మనలో ఉండే క్వాలిటీ అయ్యుండాలి, కథ రాయడానికే పుట్టుకొచ్చే ట్యాగ్ కాకూడదు. 

    ఈ సందర్భంలోనే, పలుకు.ఇన్ ద్వారా తమ రచన/పఠనాసక్తులను మెరుగు పరచుకోవాలనుకునే మిత్రులకు ప్రోత్సాహకరంగా, మీరు ప్రశ్నోత్తరాలు, కథా పరిచయం/విశ్లేషణ వంటి శీర్షిక ఏదైనా మీ అనుకూలత ప్రకారం నిర్వహించగలరా?

    తప్పకుండా! ఈ రోజుల్లో ఒక వెబ్ మ్యాగజైన్ నడపాలన్న ఆలోచన రావడమే పెద్ద విషయం.మీరు ఇంత ఇష్టంగా ఈ బాధ్యత తీసుకున్నారు. నన్నొక వర్క్‌షాప్ లాంటిది ఏదైనా నిర్వహించమంటే తప్పకుండా నిర్వహిస్తాను. 

    2